پاکستانی طلبہ کواعلی تعلیم کے مواقع فراہم کرنے کے لئے انٹرلوپ آکسفورڈ گریجویٹ اسکالرشپ کا آغاز

فیصل آباد: دنیا کی معروف ترین یونیورسٹیوں میں سے ایک آکسفورڈ یونیورسٹی میں پاکستانی طلبہ کو اعلی تعلیم کے مواقع فراہم کرنے کے لئے انٹرلوپ لمیٹڈ نے آکسفورڈ پاکستان پروگرام کے تعاون سے انٹرلوپ آکسفورڈ گریجویٹ اسکالرشپ شروع کرنےکا اعلان کیا ہے۔ اس اسکالرشپ پروگرام کے تحت ہر سال ایک ذہین پاکستانی طالب علم کو آکسفورڈ یونیورسٹی میں اعلی تعلیم حاصل کرنے کے لئے مالی معاونت فراہم کی جائے گی۔ اس سلسلے میں مجموعی لاگت کی 60 فیصد رقم انٹرلوپ کی طرف سے مہیا کی جائے گی جبکہ بقیہ رقم آکسفورڈ پاکستان پروگرام کے تحت دیگر صاحب ثروت افراد کی طرف سے فراہم کی جائے گی۔ یہ اسکالر شپ ​​آکسفورڈ یونیورسٹی میں ماسٹرز یا ڈی-فل پروگرام کی پوری مدت کے لیے مکمل ٹیوشن فیس اور رہنے کے اخراجات کا احاطہ کرے گی۔ یہ اقدام قابل پاکستانی طلباء کے لیے عالمی معیار کی اعلیٰ تعلیم تک رسائی کو بڑھانے اور پاکستان اور آکسفورڈ کے درمیان تعلیمی روابط کو مضبوط بنانے کے لیے ڈیزائن کیا گیا ہے۔ اسکالرشپ کے تحت ایسے پاکستانی شہری درخواست دینے کے اہل ہیں جنہوں نے یونیورسٹی میں کل وقتی گریجویٹ پروگرام میں داخلہ حاصل کیا ہے۔ اس سلسلے میں خواتین درخواست دہندگان اور پسماندہ پس منظر کے طالب علموں کو ترجیح دی جائے گی۔ واضح رہے کہ انٹرلوپ لمیٹڈ کے چیئرمین مصدق ذوالقرنین آکسفورڈ پاکستان پروگرام کے اسٹریٹجک ایڈوائزری بورڈ کے بھی رکن ہیں۔ انہوں نے کہا ہے کہ پاکستان دنیا کی سب سے زیادہ نوجوانوں کی آبادی والا ملک ہے اور نوجوان طبقے کی بڑی تعداد اعلی تعلیم کے حصول کے لئے بہتر سے بہتر مواقع کی تلاش میں ہے۔ انہوں نے کہا کہ یہ سکالرشپ سائنس، معاشیات اور ہیومینٹیز سمیت مختلف شعبوں میں مستقبل کے لیڈرز اور مفکرین کی تیاری میں معاون ثابت ہو گی اور اس اقدام سے ملک کی بامعنی ترقی کی کوششوں کو تقویت ملے گی۔ واضح رہے کہ انٹرلوپ لمیٹڈ پاکستان کے سرکردہ برآمد کنندگان میں سے ایک ہے جو بڑے بین الاقوامی برانڈز اور عالمی گاہکوں کو مختلف اقسام کے ملبوسات فراہم کرتا ہے۔ یہ کمپنی 37 ہزار سے زیادہ افراد کو ملازمت فراہم کرنے کے علاوہ اپنے اخلاقی اصولوں پر مبنی کاروباری طریقوں، تحفظ ماحولیات کے اقدامات، سماجی ترقی اور تعلیم کے فروغ کے لئے کوششوں کے حوالے سے شہرت رکھتی ہے۔ علاوہ ازیں آکسفورڈ پاکستان پروگرام کا بنیادی مقصد آکسفورڈ یونیورسٹی میں پاکستانی طلبہ کو زیادہ سے زیادہ تعلیمی مواقع فراہم کرنے کے ساتھ ساتھ پاکستان سے متعلق تدریس، تحقیق اور اسکالرشپ کے مواقع کو بڑھانا ہے۔