الیکٹرو بسوں کے روٹس پر 14 کروڑ روپے کی لاگت سے 100 الیکٹرک بس شیلٹرز قائم کئے جائیں گے

فیصل آباد: الیکٹرو بس سروس کے دو روٹس پر 14 کروڑ روپے کی لاگت سے 100 الیکٹرک بس شیلٹرز قائم کئے جائیں گے۔ یہ فیصلہ ڈویژنل ڈویلپمنٹ ورکنگ پارٹی کے اجلاس میں کیا گیا ہے۔ کمشنر راجہ جہانگیر انور نے الیکٹرک بس شیلٹر کی تیاری کے کاموں میں تیزی لانے کی ہدایت کی اور کہا کہ تین شفٹوں میں کام کے لئے متعلقہ ٹھیکیدار کو متحرک کریں۔انہوں نے کہا کہ10 جنوری 2026 تک 40 بس شیلٹر مکمل ہونے چاہیں۔انہوں نے کہا کہ وہ خود بس شیلٹر کے تعمیراتی کاموں کی مانیٹرنگ کریں گے اس ضمن میں معمولی سی بھی تاخیر کی گنجائش نہیں ہے۔ انہوں نے کہا کہ وزیراعلی پنجاب نے یہ اہم ٹاسک تیزی سے مکمل کرنے کی واضح ہدایات جاری کی ہیں اس لئے متعلقہ محکمے اپنی ذمہ داریوں کا ادراک کریں۔ اجلاس میں ڈپٹی کمشنر ندیم ناصر، ایڈیشنل کمشنرز تنویر مرتضی، آصف اقبال چوہان، چیف آفیسر میونسپل کارپوریشن ملک مرتضی، ڈپٹی ڈائریکٹر ڈویلپمنٹ سید نوید اقبال، ایس ایس ہائی ویز اور دیگر افسران شریک تھے۔